Proiektu hori jendaurrean ipiniko du Udalak, baina, hori egin aurretik, falta den dokumentazioa eskuratu behar dute. Horren ostean aurkeztu ahal izango dira alegazioak.
Proiektua egiteko, Legarreko pabilioi guztiak bota egingo dituzte, ordenazioz kanpo daudelako.
Deba ibaia berreskuratu
Orube horretan, 7.622 metro koadroa erabiliko dituzte proiektua egiteko. Horietatik 5.712 metro koadro etxeak eraikitzeko erabiliko dituzte, eta beste 1.910, bestelako lanetarako. Horien artean, besteak beste, Deba ibaia ekologikoki berreskuratu egingo dute. Horrez gainera, ibaiaren ubidea ahalik eta gehien txikitzen ahaleginduko dira, modu horretara, ahalik eta espazio gehien lortzeko.
Behin hori guztia egin eta gero, inguru guztia eraikiko dute errekara begira. Horrez gainera, hango zirkulazioa eta oinezkoendako ibilbideak berrantolatu egingo dituzte. Lan horien artean, besteak beste, biribilgune berri bat eraikiko dute Gipuzkoa etorbidean, Santa Marina auzora igotzeko dagoen bidegurutzean.