Etxean dira denak
Orotara, 47 izan dira zapatu goizaldean Garibaiko La Caixaren bulegoari eraso egin izanaren ondorioz azken egunak Hotel Mondragonen eman behar izan dituztenak. Astean zehar euren etxeetara bueltatzen joan dira eta gaur goizean itzuli dira azkeneko biak.
Ambrosio Fernandez, hobeto
Txagorritxun, arnas arazoengatik ospitaleratu zuten Ambrosio Fernandez arrasatearraren egoera, berriz, hobetzen doala jakinarazi du Inazio Lakuntza alkateak, nahiz eta oraindik Zainketa Intentsiboetako Unitatean egon. 79 urteko gizonezkoak gaixotasun larriak izan ditu, eta zapatu gaueko gertakariek ez zioten onik egin. Bere emazteak adierazi du, baina, hasi dela tratamenduari erantzuten eta nahiko egonkor dagoela.
Konponketak
Suak eta keak kaltetutako Roneoko etxeen konponketak ere bide onetik doazela jakinarazi du Inazio Lakuntzak: Gas-instalazioa konponduta dago, baina etxearen aurreko aldea, besteak beste, margotu egin beharko dute. La Caixakoek hiru bat hilabete beharko dituzte bulego berria egiteko; BAZen ondoan ireki dute behin-behinekoa.
Salaketak
Salaketei dagokienez, Goienkaria-k batutako azken datuen arabera, 32 salaketa aurkeztu dituzte orain arte Ertzaintzan eta ez dituzte askoz gehiago espero. Kalte gehienak keak eragindakoak izan direla ere esan dute Bergarako komisariatik. Salaketak Audientzia Nazionalera bideratuko dituzte.
Dendak
Garibai etorbidean dauden UME eta Loramendi Kirolak dendak ere badabiltza normaltasunera bueltatzeko ahaleginetan.
UME-k, esaterako, bihar zabalduko ditu ateak, eta dendako genero guztia ipiniko du salgai %60-70eko beherapenekin. Denda bere onera ekarri dute dagoeneko, baina peritua kalteen balorazioa egiten dabil oraindik.
Bestalde, Loramendi Kirolak dendakoek aurreikusten dute, hilabete-edo beharko dutela Garibaiko denda bere onera bueltatzeko.
Bitartean, keak eta kedarrak kaltetutako generoa likidatu gura dute eta Erdiko kaleko lokal bat egokitzen dabiltza, lehen Nerea denda zegoen lekuan. Zapatuan ireki gura dute, baina perituarekin egon behar dute ezer egin aurretik.