Aldebakarrekoa. Horrelaxe kalifikatu dute LAB sindikatutik Kutxaren zuzendaritzak bulego guztiak goiz eta arratsaldez irekitzeko erabakia. Salatu dutenez, iraila hasieran komunikatu zieten enpresaren erabakia, eta iraila erditik aurrera jarri zen indarrean, negoziatzeko aukera barik.
Salatu dute, baita ere, langileen ia %60ri eragiten dien erabakia dela, eta langileen kontrako neurritzat jo dute, bizitza laborala eta familiarra bateratzea zailduko duelako.
Gaineratu dutenez, aurretik 30 bat bulego ireki izan dituzte arratsaldez, baina negoziorik ez zegoela eta batzuetan arratsaldez istea erabaki dute. horregatik, LAB sindikatutik azaldu dute ez dutela arrazoi operatiborik ikusten.
Leihatilarik ez arratsaldeetan
Adierazi dute, era berean, ordutegi berriarekin leihatilako orduak murriztu egin direla: bost ordu eta erditik, bost ordura pasatuta. Arratsaldeko orduak kudeaketetarako bakarrik direla ere zehaztu dute, ez leihatilarako, eta horrek bezeroen artean kexak eragin dituela.
LABek presioak eta xantaiak salatu ditu, eta azpimarratu du Kutxan ordezkaritza duten sindikatu guztiak daudela kontra. Dena den, zuzendariekin negoziatzeko borondatea dutela gaineratu dute.