Kontzertu uholdea, ikasturteari merezitako amaiera emateko

Heldu da urte osoan zehar ikasitakoa lau haizeetara zabaltzeko ordua, hots, heldu da ikasturte amaiera. Eta, urtero moduan, Arrasate Musikalen egutegia kontzertuz betetzen da, beste hainbat musika eskoletan gertatzen den moduan. Bada, datorren astelehen eta eguaztena bitartean lau kontzertu eskainiko dituzte.

Astelehen eta martitzenean haizezko instrumentuak izango dira protagonista. Bi kontzertu izango dira: batetik, saxofoi ikasleek Monterron jauregian eskainiko dute emanaldia: astelehena, hilak 25, 19:00etan. Arrasate Musikaletik iragarri dutenez, ikasle dezentek hartuko dute parte Mario Fernandinok zuzenduko duen saioan. Eta, bestetik, martitzenean, hilak 26, tronpeta, fliskorno eta tronpa jotzen duten ikasleek Kulturaten eskainiko dute kontzertua. Kontzertua 18:30ean izango da, eta Ramses Uralde, Edorta Ayastuy eta Gaizka Gaztelurrutia dira ikasleon arduradunak.

Eguaztenean, hilak 27, gitarra eta piano ikasleen txanda izango da. Gitarra joleek Kulturaten joko dute 18:00etan, Asun Auzmendi musika irakaslearen gidaritzapean.
Eta azkenik, egun berean piano ikasleek Bergarako musika eskolan joko dute, 18:30ean. Piano joleen arduradunak dira Isabella Blezien eta Raquel Hernandez.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.