Musakolako kiroldegian konfirmatu digute jendea badabilela aurtengo ikasturteari begira izena ematen, ikastaroak irailaren 22an hasiko dituzte-eta. Berritasun gehiago ere izango ditu kiroldegiak. Eta pilates gustuko dutenendako, eskaintza oso interesgarri bat: pilateseko hastapen ikastaroa, doan. Pilates egin ahal izateko, beharrezkoa da gutxieneko nozio batzuk izatea eta horretarako hastapen ikastaroa egin beharra dago; bada horixe da irailean doan eskainiko dutena.
Lau saio egingo dituzte bi astean, eta saio horiek eginez gero, jendeak gero aukera izango du pilateseko gura duen ikastaroan izena ematea. Iraileko aukera bukatu ostean, hastapen ikastaro hori ordaindu egin beharko da, orain arte egin izan den moduan.
Eta berritasun gehiagoren artean, Musakolako kiroldegitik aurreratu dute igeriketan ere izango dela halakorik. Adibidez, aurten sei hilabetetik 36 hilabetera bitarteko umetxoendako igeriketa ikastaroak izango dira. Eta 3 urtetik aurrera, mailen arabera sailkatutako ikastaroak izango dira, metodo berritzaile bat erabilita.
Informazio gehiago behar duenak, kiroldegira joan barik, Biztanleen Arreta Zerbitzuan aurki dezake; izan ere, ikastaroen gaineko informazioa emateko bideo daude BAZen. Bideo berak daude Musakolako kiroldegian eta jakina, hara joanez gero, zuzeneko informazioa ere eskura daiteke.