Eta gainera, gai mordoska landuko dituztela iragarri dute. Tartean, adibidez, katu kontuak berbagai izango dituzte gobernuko kideek. Izan ere, Kaonbi (Katuak Ondo Bizi) izeneko elkartea aurkeztu behar dute. Izenak esaten duen moduan, aurrerantzean Arrasaten dauden kaleko katuen kolonien ongizatearekin eta haien kontrolarekin arduratuko den taldea da hori.
Obra kontu ugari ere iragarri dituzte gaurko batzarrari begira. Adibidez, udalerrian oztopo arkitektonikoak kentzen jarraitzeko 2008. urteari dagokion proiektuko obrak adjudikatuko dituzte; Uribarri, Iturripe, Uribe, eta Anboto kaleko ur eta saneamendu zerbitzuak berritzeko obrak adjudikatuko dituzte. Eta beste obra pare bat aipatzearren, GI-627 errepidean zorua konpontzeko obrak egin behar ditu Diputazioak eta Laubide plazako zoladura birjartzeko asmoa dauka Udalak.
Bestelako gaien artean, berriz, pare bat hitzarmen izango ditu udal gobernuak mahai gainean: bata ASPACE elkartearekin sinatzekoa eta bestea Euskal Herriko Unibertsitatearekin sinatzekoa.
Eta Kultura eta euskara gaien artean, aztertuko dute, adibidez, Arrasateko Udal Bibliotekan auto-mailegu zerbitzua bideratzeko beharrezko ekipamendua erosteko aukera; eta itzulpen kontuekin arduratzen den Arrasateko Goihata enpresak laguntza eskatu dio Udalari euskara-japoniera hiztegia eguneratu eta mantentzeko.