Ama Cerrajera liburua kalean da. Egubakoitzean aurkeztu zuten egileek: Jose Mari Velez de Mendizabal, Jose Angel Barrutiabengoa eta Juan Ramon Garaik. Ino Galparsoro alkatea lagun izan zuten mahaian.
Velez de Mendizabalek enpresaren historia kontatu du liburuan, 50 urteko zikloak bereiziz. Bertaratutakoei eskaini die liburua: "Produktu duin bat da, bihotzez egindakoa, Juan Ramon, Jose Angel eta hirurok hemen islatu dugun produktua, baina benetako protagonistak zuek zarete", esan zien entzuleei.
Jose Angel Barrutiabengoak, bestetik, Zerrajerako momentu goxoak bildu ditu. Juan Ramon Garaik, azkenik, langileen mugimenduak enpresaren historian izan duen garrantzia landu du liburuan. Aurkezpen ekitaldian Zerrajerak bizirik dirauela gogorarazi nahi izan du: "Batzuek uste dute Zerrajera ez dela existitzen dagoeneko; baina, langile gutxiagorekin bada ere, lanean jarraitzen du".