Moises Altunak, Obren Saileko teknikari buruak, jakinarazi duenez, bi lekutan indartuko dute argiteria: batetik, Otalora kaletik sartuta, Santa Barbara parkearen hasieran, ziburu-zaburuak dauden leku inguruan; eta, bestetik, Otalora kalea eta Arrasate Pasealekua lotzeko parke barrutik doan bidetxoan ipiniko dituzte farola berriak.
Hobekuntza beharra
Altunak adierazi duenez, Udala konturatuta zegoen Santa Barbaran farola gehiago ipintzea komeni zela. Hori horrela, parke inguruan ur zikinak batzeko intertzeptoreko obrak egin zituztenean, guztia gertu utzi zuten farola berriak sartzeko.
Gabonetarako, eginda
Lehen esandako moduan, proiektu hori onartu egin dute orain, baina oraindik obrak adjudikatu egin beharko ditu Udalak. Laster egin gura dute guztia. "Kontratu txikia da: 30.000 euro inguruko aurrekontua dute obrek. Horregatik, eskaintzak guk eskatuko ditugu, lanak lehenbailehen adjudikatu ahal izateko", azaldu du Moises Altunak. Hark gaineratu duenez, Obra sailaren asmoa da Gabonetarako lan horiek eginda uztea.