Donostian egin zuen Gipuzkoako Erretiratuen eta Pentsiodunen Elkarteko urteko batzar nagusia, Londres hotelean; 190 lagunek parte hartu zuen, tartean Markel Olanok, Gipuzkoako Diputatu nagusiak, eta hantxe onartu zuten Riviereren hautagaitza elkarteko presidente izateko. Datozen lau urteotarako hartu du kargua, “lehenago aspertzen” ez bada, bere esanetan.
Rivierek jakinarazitakoaren arabera, argi dauka lau urteotarako lan ildoa. Lehenengo eta behin, Gipuzkoako elkarteko zuzendaritza taldea osatu gura du arrasatearrak; “elkarteko estatutuen arabera hamabi lagunek osatutako taldea” izan arren, hamabi lagun ez daudela jakinarazi du Rivierek.
Pentsioen alde
Behin taldea osatuta, Gipuzkoako elkartearen izaera ere aldatu gura du. Bere esanetan, orain arte bakarrik aisialdiarekin lotutako ekitaldiak antolatu dituzte, eta elkartea hori baino gehiago izatea gura du Rivierek. Adibidez, pentsioen alde borrokatzeko asmoa du bestelako elkarte batzuetako ordezkariekin batera, “gutxieneko pentsioak” hobetu ditzaten lortzeko, oso txikiak direlako.
Garraio zerbitzuak
Garraio zerbitzuak ere jomugan ditu Rivierek. Gogora ekarri du urtetan asko hobetu direla, besteak beste, gure ibarrean; orain Donostiara joatea askoz ere errazagoa da, autobus zerbitzuak ospitale inguruetan geratzea ere lortu da, eta hori, “erretiratuen lanari esker” lortu dela dio Rivierek. Hala ere, azpimarratu du ildo horretan asko dagoela egiteko; adibidez, Arrasatetik Bilborako garraio zerbitzua eskasa dela uste du Arrasateko ordezkariak.
Hiru elkartetako presidente
Beraz, halakoak eta beste eramango ditu Gipuzkoako Erretiraten eta Pentsiodunen elkartearen mahai gainera Jose Riviere arrasatearrak. Eta nahikoa lan izango du esku artean. Izan ere, Gipuzkoako elkarteko gidaritza lana hartzeaz gainera, Debagoieneko elkarteen ordezkaria ere bada, eta baita ere Arrasateko Abaroa erretiratuen egoitzako presidentea.