Berrikuntza
Marga Garmendia Enplegu eta Garapen Ekonomikoko zerbitzuko Udal teknikariaren esanetan, "antolaketa lan handia egin dugu, eta helburua jendea bertara joatea izan da. Azoka eskualdeko erosle guztiei zuzenduta egon da: denontzako egon da zer edo zer".
23 denda zeuden bertan: 16 Arrasatekoak, bost Bergarakoak eta beste bi Aretxabaletakoak, gehienak, arropa eta zapata dendak. Baina jantzi osagarriak, altzari denda, lentzeria eta kirol denda ere bazeuden bertan.
Merkemerkau izenak berak dioenez, diru gutxirekin gauza asko erostea zen helburua. Merkealdiak urtarrilean hasi ziren, eta geratzen diren produktuak merke-merke zeuden bertan. "Helburua ez da biltegia hustea; eskualdeko merkataritza dinamizatzeko zerbait egiteko beharra ikusten genuen", azaldu dute antolatzaileek.
Dendariek biltegian zutena ateratzeaz gain, erosleek ere aukera zabala eduki dute. "Eskualdean, aurrez, ez zegoen horrelakorik eginda, baina gainontzeko herrietan egindakoek arrakasta eduki dute, eta guk ere saiatzea erabaki genuen", adierazi digu Garmendiak.