"Iaz ere parte hartu genuen eta orduan laugarren geratu ginen; aurten, podiuma egiteko asmoarekin etorri naiz", dio Arconadak. Gaineratu du, zapatuan Oñatiko duatloia egin zuela eta horregatik zerbait nekatuta iritsi zela domekako probara.
Aldapa askoko lasterketa
Errenteriako Txakur krosa 7,5 kilometroko lasterketa izan zen: "Nahiko gogorra izan zen: hiru aldapa gora eta beste hiru aldapa behera zituen zirkuituak. Esan behar da, txakurrarekin egiteko oso lasterketa polita zela", dio Arconadak. Hasierako metrotatik lasterketako buru jarri zen arrasatearra.
Azkenean, baina, Pedro Etxeberria zumaiarrak eta Zura txakurrak irabazi zuten lasterketa. "Mendiko lasterketetan esperientzia handiagoa dauka Etxeberriak", azaldu du Arconadak. Arconadak garaikurra jaso zuen eta Iron txakurrak lehenengo arraren saria.
Bi urte eta erdiko txakurra
Arrasatearrak egun baten bai eta hurrengoan ez entrenatzen du. Dio dagoeneko ezagunak direla herrian: "Dobermanarena deitzen naute", dio.
Bi urte eta erdiko txakurra da Iron. Errenteriako proban bi aldiz ibili da, eta hilaren 29an Sorian jokatuko den probara joan da. Lasterketa mota honetan beharrezkoa izaten da txakurra pertsona baino lehenago joatea. "Txakurra geratzen bada, zu ere atzean geratu behar zara", azaldu du Javier Arconadak.