Eskatzen dutena da gaur eta bihar, egubakoitz eta zapatua, Eroskira erosketak egitera goazenean, erositakotik apurtxo bat ematea. Justu horixe da janari bilketa kanpainaren leloa: Zure erosketako pixka bat asko da.
Arroza, pastak eta kontserbak
Produktuei dagokienez, bereziki, honako hauek batu gura dituzte: arroza, lentejak, garbantzuak, babak, azukrea, olioa, esnea, irina, pastak eta kontserbak. Berriz, izoztutako janaririk, alkoholdun edaririk eta dirurik ez emateko eskatzen dute.
Eroskik batutakoaren %20
Kaxak ipiniko dituzte kontsumitzaileen ekarpena batzeko eta Janari Bankuko boluntarioak ere egongo dira, laguntza eskaintzeko. Bestalde, Eroski Fundazioak iragarri du eurek ere egingo diotela ekarpena kanpainari: kontsumitzaileek emandako kiloen arabera, %20 gehituko du fundazioak.
Janariak biltzeko kanpaina hori beteranoa da gurean. Aurtengoarekin egingo duten 25. aldia izango da.