Laugarren aldia izango da PP Arrasateko alkatetzara aurkeztuko dena, eta bigarren aldiz Itziar Lamarain izango da zerrendaburua. Azken legealdian egindako lana errepasatu du Lamarainek, eta aurrera begira Arrasaterako dituen proposamenen berri ere eman du: "Hirugarren adinekoendako egoitza berria martxan jartzea da proposamenetako bat, Iturbide egoitzan sartzeko zain dagoen jendea sartu ahal izateko".
Behin baino gehiagotan salatu ditu Itziar Lamarainek Arrasateko udalean dauden zenbait alderdiren oportunismo eta iritzi aldaketak. Zentzu horretan, koherentzia izan da bere lana defendatzeko erabilitako hitza: "Koherentziaz eta aldaketarik gabe lan egitea defendatzen dut nik. Ez dugu gorabeherarik, ez gara gauetik goizera zuritik beltzera pasatzen. Gure lana Arrasate hobe eta aske baten alde egiten dugu".
Arrasateko udalerako aurkeztuko diren alderdi popularrekoek osatutako zerrenda oraindik osatu gabe badago ere, datorren martxoaren 26 baino lehen erabakita izango dute zeintzuk aurkeztuko diren.