Etxez etxeko laguntza zerbitzuko itxaron zerrendarekin amaitzea erabaki dezakete gaur

Tokiko Gobernu Batzordeak asteroko batzarra egingo du gaur 15:00etan. Landuko dituzten gaien artean, proposatuko dute Tokiko Gobernu Batzarrak onespena ematea Gizarte Zerbitzuen proposamen bati: etxez etxeko laguntza zerbitzurako dagoen itxaron zerrenda ezabatzen ahalegintzea. 20 lagun daude gaur egun itxaroten etxeko laguntza zerbitzua eskuratzeko. Bi urtetik hona existitzen da itxaron zerrenda hori.
Proposamen hori joan den eguenean onartu zuten Gizarte Zerbiztuen batzarrean. Ander Rodriguezek, sail horretako zinegotziak, Goienari azaldutakoaren arabera,  gaur Tokiko Gobernu Batzarrak proposamen hori onartzekotan, bizpahiru aste barru abiaraziko luketela. Eta hark gobernu batzarrean onartuko dutenaren itxaropena badu. Gogorarazi du gobernu berria dagoela orain eta hitzartuta dutela gizarte zerbitzuei plus berria ematea eta lehentasuna eman behar zaiola etxeko laguntzarako itxaron zerrenda bertan behera uzteari. Horrez gainera, Ander Rodriguezek gaineratu du eurek egin behar dutena ez dela bakarrik itxaron zerrenda bertan behera utzi, baizik eta gura dute gaur egungo araudiari begirada eman eta erreformatu, zerbitzua hobetzeko, zerbitzu integral eta eraginkorra eman ahal izateko.

Tokiko Gobernu Batzarra, gaur

Bestalde, gaurko Tokiko Gobernu Batzarrean landuko dute, baita ere, Udaltzaingoaren egoitza berriaren gaineko gaia. Gogora ekarri beharra dago Udaltzaingoak egoitza berria izango duela Nafarroa Etorbidean. Udalaren asmoa da egokitzea INEM-en bulegoen pareko eraikinaren zati bat, biribilgunearen ondoan dagoena. Hala, eraikin hori egokitzeko obrak adjudikatzea proposatuko dute gaur arratsaldeko batzarrean.

Adjudikazio kontuekin jarraituz, gaur proposatuko dute, baita ere, Uribarriko erretiratuen etxeko tabernako atezain zerbitzua adjudikatzeko prozedurari hasiera ematea.

Horrez gainera, bestelakoen artean, obra kontuak ere berbagai izango dituzte gaurko batzarrean. Hain justu ere, San Frantzisko elizako teilatua berritzeko proiektua eta hari dagozkion obrak izango dituzte berbagai. Bukatzeko, Kanpantzar harrobia dela-eta, 2007ko lehen seihilekoaren zintza planaren txostena aurkeztuko dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.