Iturbide egoitzako langileen ordezkariek eta Udalak bilera erabakiorra izango dute eguaztenean

Iturbide egoitzako auziak egun erabakiorrak bizi ditu. Eguaztenean, hilak 22, Udalaren eskaintza berria xehetasun guztiekin ezagutzeko bilera izango dute bi aldeetako ordezkariek. Izan ere, Aste Santu hasieran Udalak luzatutako proposamen berriaren ostean greba eten zuten Untza enpresako langileek. Eskaintza berriak lau urteren buruan soldata %30,65a igotzea eta Udaleko langileen igoerak eurei ere linealki aplikatzea jasotzen du.

Iturbideko egoitzan lanean diharduten Untza enpresako langile azpikontratatuen auzia bere onera etortzen ari dela dirudi. Hala ere, oraindik ezin da greba amaitu denik esan, eguaztenean Untzako langileen ordezkariek Udaleko ordezkariekin izango duten bilera erabakiorra izango da-eta. Hasiera batean joan den egubakoitzean, hilak 17, egin behar zuten batzarra baina Pazko astean udaleko zenbait teknikari oporretan izan direla-eta etzira arte atzeratzea erabaki zuten.
Untza enpresako langile azpikontratatuek martxoaren 24an hasitako greba etetea erabaki zuten Aste Santu hasieran. Grebari Udaletxeko langileen baldintza berak lortzeko ekin zioten; labur esanda, baldintzen parekatzearen alde hasi ziren borrokan. Bada, ordutik astero bildu izan dira udaletxe aurrean eta osoko bilkura batera ere eroan zuten euren protesta –irudian–.

Udalaren proposamena
Iturbideko egoitzan diharduten Untzako langileek euren ahotsa ozen entzunarazi arren, ez dute, oraingoz behintzat, eskatutakoa lortzerik izan. Honakoa da Udalak egin dien azken proposamena: lau urteren buruan langile bakoitzari soldatak %30,65 igotzea eta urteko Kontsumo Indizeen prezioa (KPIa) eta udaletxeko langileei aplikatzen zaizkien igoerak linealki eurei ere aplikatzea.
Proposamen horren aurrean greba etetea erabaki zuten Untzako langileek, eta Udalarekin bildu arte lanean jarraitzea. Hori horrela, Juan Ramon Garai ESK sindikatuko kide eta grebaren koordinatzaileak jakinarazi duenez, "eguazteneko bileran gertatzen dena ikusi beharko da, Udalaren proposamena zein epetan eta nola gauzatuko den zehazten denean".

Untzak esleipenari uko egitea
Bestalde, Untza enpresak zerbitzuaren esleipenari uko egitea ere kaltegarria litzateke langileendako. Langileen ustez "enpresa azpikontratatu batek betebehar batzuk ditu enpresa kontratatzaileekin, eta beraz, enpresak lana betetzen jarraitu behar du".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.