Carrascoren emazte, seme-alaba, arreba, eta gainontzeko senitartekoek, Alderdi Sozialistako euskal exekutibako kideak eta Arrasateko zinegotziak izan dituzte lagun. Oinez egin dute Navas de Tolosa kalean barrena aurrera, lora sortak eta arrosak eskuetan, iaz data berdinean Carrasco hil zuten tokiraino bertaraino. Han, lurrean, hunkiturik eta negar malko artean, lora sortak eta arrosak eskaini dizkiote Isaias Carrascori.
Politikariek ere bat
Aurpegi ezagun ugari hurbildu da gaur eguerdian Arrasatera, hala nola Arrasateko PSEko, EAJko eta PPko zinegotziak. Baina, horiei, PSEko Euskal exekutibako kideek kendu dizkiete protagonismoa. Hala nola, Patxi Lopez, Manuel Huertas, Migel Buen, Rafaela Romero, Elvira Kortajarena, Charli Prieto, edota Eduardo Madina, izan dira omenaldian. Gainera, ETAk azken atentatuan hil zuen Iñaxio Uriaren senitartekoak ere izan dira Carrascoren familia laguntzen.
Lore eskaintzaren ostean, Patxi Lopezek, PSEko idazkari orokorrak, eta Carrascoren alaba nagusienak hartu dute hitza. Lopezek esan du Carrascoren "delitu bakarra askatasuna eta sozialisten ideiak defendatzea" izan zela. Gaineratu du hura hil zutenak inoiz baino ahulago daudela eta isilarazi gura izan dituzten sozialistak eta demokratak inoiz baino indartsuago: "Esango nuke, joan den igandeko hauteskundeak horren adierazle garbia direla".