Hiru lagun atxilotu zituen Frantziako poliziak atzo goizean (domeka) Normandian, Frantzia iparraldean: Ibon Gogeaskoetxean, Beñat Aginagalde eta Gregorio Jimenez. Hain zuzen, Aginagalderi (Hernani, 1984) Isaias Carrasco PSE-EEko Arrasateko zinegotzi ohiaren hilketa (2008an) leporatzen dio poliziak, eta baita ere, Inazio Uria enpresaburu azpeitiarraren hilketa. Polizia iturrien arabera, iazko martxoaz geroztik zegoen ihes eginda Beñat Aginagalde.
Ibon Gogeaskoetxea, berriz, ETAko buruzagi nagusietako bezala jo dute.
Izen faltsuak
Polizia frantsesak atxilotu zituen ustezko hiru ETAkideak, Guardia Zibilarekin elkarlanean. Informazioaren arabera, izen faltsuarekin errentan hartuta zeukaten etxean atzeman zituzten. Etxean, berriz, hainbat material aurkitu dute: hiru pistola, lehergaiak egiteko materiala, dokumentazio faltsua eta beste.