Martxoak 8aren atarian zuzeneko ezin hobea da Anarirena. Arrasateko Udaleko Kultura Sailak aspalditik ekarri gura zuen artista azkoitiarra Amaia antzokira, gurean disko berria aurkez zezan. Hala ere, adierazi dutenez, Emakumeen Nazioarteko Egunaren bueltan badator, "askoz hobeto". Izan ere, aldarrikapen eguneko egitarauaren barruan sartu dute Anariren kontzertua. Baina taldekideek jakinarazi dutenez, biharko kontzerturako ez dute Emakumeen Egunarekin lotutako ezer berezirik aurreikusi. Horrek, baina, ez dio emanaldiari interesgarritasunik kentzen.
Sentimendu eragile
Anari ez da musikari oparoa. Diskoak ekoizterako orduan diskogintzan eman ohi den erritmoa ez du beste hainbat musikarik moduan errespetatzen. Hau da, ez du une zehatzetan diskoa ateratzen. Jarraikortasun horren faltak, baina, ez du eragozten diskoa ateratzen duenean Anariren izena nonahi agertzea. Haren material berriak erakarri egiten du, finean, haren ahotsaren sakontasunak hamaika sentimendu sorrarazten dituelako.
45 minutu inguruko bidaia
Hamar kantu ditu Irla izan diskoak; 45 minutu inguruko bidaia. Grabaketa eta nahasketa Karlos Osinagarekin egin dituzte, Garate estudioetan. 2009ko urrian kaleratu zuten eta hamaika lekutan aurkeztu dute diskoa. Eta oraindik ere aurkezpen bira luzea geratzen zaie...