Irailean moduan segituko dute mezek parrokian

Datorren domekatik aurrera, San Juan parrokian bi meza esango dituzte; bata euskaraz, eta hori izango da 11:00etan, eta bestea gaztelaniaz, eta hori izango da 13:00etan. Horixe da parrokiak oraingoz izango duen aldaketa bakarra, gainerako mezei dagokienez, orain arte moduan segituko dute-eta.

Hau da, astean zehar ez dute mezarik esango San Juan Parrokian; hori bai, hiletarik balego, hori egingo lukete 19:00etan eta zapatuetan eta jai egin bezperetan, berriz, 19:00etan esango dute meza.

Gogoan izango duzuenez, Genaro Lekuona parrokoak bihotzekoa izan zuen oporretan zegoela eta haren gaixotasunak eragin zuen meza aldaketa. Jon Molinak, San Andresko parrokoak Arrasate Irratiari jakinarazi dionez, Genaro Lekuona oraindik ere atseden hartzen dabil eta ez du mezarik esango. Hori horrela, gainerako apaizen artean txandaka esango dituzte parrokiako mezak.

Gainerako elizak
Arrasateko gainerako elizei dagokienez, berriz, hirutan esaten dituzte mezak. San Andresen, astegunetan, zapatuetan eta jai bezperetan esaten dituzte, 19:00etan. Eta domeketan, berriz, hiru zerbitzu eskaintzen dituzten, 10:00etan eta 12:30ean gaztelaniaz eta 11:00etan, euskaraz.

Musakolako San Isidro elizan, berriz, zapatuetan eta jai bezperetan 20:00etan esaten dituzte mezak eta domeketan, 12:30ean.

Azkenik, Uribarriko Itxaropeneko Andra Maria parrokian domeketan esaten dituzte mezak, 12:00etan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.