Osokoan landuko dituzten gaiei dagokienez, gainera, azken egunotan albiste izan den ANVren ilegalizazioarekin lotura zuzena duten bi puntu landu behar dituzte zinegotziek. Izan ere, Eusko Abertzale Ekintza desegin eta Talde Mistoa sortzeko udalbatzarrak joan den maiatzean hartu zuen erabakiarekin dute zerikusia.
Batetik, Talde Mistoa sortzearen erabaki hori jendaurrean izan zenean, alderdi sozialistak alegazioak aurkeztu zituen, kontra. Bada, gaurko batzarrean haiei erantzun egingo diete. Horrekin batera, Talde Mistoa sortzearen gaineko erabakia behin betiko onartzea proposatuko dute.
Bestetik, Talde Mistoaren sorrera dela-eta Estatuko Abokatuak erabaki hura ez aplikatzeko eskaera egin zuen; bada hari erantzuten dion Udalaren dekretua jakinaraziko dute.
Dena den, gogoan izan beharra dago gai horren harira, Estatuko Abokatuak errekurtsoa ipinita daukala erabaki horren kontra. Espainiako Estatuko Abokatuak eman duen arrazoia izan da Talde Mistora pasatzea aurreikusita zegoen eta orain gauzatu egin den Eusko Abertzale Ekintza alderdiaren ilegalizazioa saihesteko modu bat besterik ez dela.
Joan den maiatzaren 21ean disolbatu zuten Eusko Abertzale Ekintzaren taldea Arrasateko Udalean. Maiatzaren 29an egindako osoko bilkuran, berriz, Eusko Abertzale Ekintzako zinegotziak Talde Mistora pasatzea onartu zuten udal gobernuko kideen, EAJren, Aralarren, EAren eta EB-Zutik koalizioko zinegotzien aldeko botoekin eta PSE-EEren eta PPren kontrako botoekin.