Inguruko zaratak eta bidegorriak aztergai, arratsaldeko batzarrean

Zarata kontuak landuko dituzte, besteak beste, gaur arratsaldean (astelehena) udal agintariek, gobernuaren asteroko batzarrean. Hain zuzen ere, jakinaraziko dute Gipuzkoako bide ardatz nagusietan zarataren kontrako jarduera plana egin duela Gipuzkoako Diputazioak eta egunotan Arrasateko Udaletxean dagoela plan hori, interesa duten herritarrek ikus dezaten.

Horrez gainera, gaurko batzarrean Diputazioaren kontu gehiago ere landuko dituzte; kasu horretan azpiegitura kontuak. Izan ere, San Prudentzio-Oñati eta San Prudentzio-Epele bide zatiaren lehen faseari dagokion proiektua ere jendaurrean dagoela jakinaraziko dute.

Eta obra gai gehiago ere bai; batetik, Gazteluondo eta Arrasate pasealekua lotuko dituen bideari dagokion proiektua berbagai izango dute; eta bestetik Santa Marina auzoa urbanizatzeko obrak ere aztergai izango dituzte.

Bukatzeko, beste gairen bat aipatzearren, Azuolan 2008 izeneko formazioa zerbitzuaren adjudikazioa aztertuko dute. Hori guztia eta gehiago landuko dute gaur 15:00etan hasita. Guk ohi dugun moduan, datozen egunotan helaraziko dizkizuegu herriko agintariek hartu dituzten hainbat erabakiren gaineko xehetasunak. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.