Ikutixon ez dute zabortegirik egingo

Ikutixon zabortegirik ez dutela egingo erabaki du behin betiko Arrasateko udal gobernuak. Iaz, legegintzaldiaren hasieran, gobernua osatzen zuten EAEk eta EB-Zutik koalizioaren asmoen artean, horixe jakinarazi zuten: Ikutixo inguruan aurreikusita zegoen zabortegi industriala ez zutela gauzatuko.

Bada orain asmo hori erabaki bihurtu dute. Hori horrela, hurrengo pausoa da Arrasateko Egitamu Orokorra aldatzea eta Ikutixo gune ez hiritargarri moduan kalifikatzea.

Ikutixon industria zabortegia sortzeko asmoa aurreko legealditik dator. EAJk eta EAk baiezkoa eman zioten proiektuari. Asmoa zen 142.300 metro karratuko hedadura eta 40 metroko altura izango zituen zabortegia eraikitzea. Hain justu, gura zuten eraiki Olandixoko tunela eraikitzeko obretako lur soberakinak batzen hasteko.

Baina, proiektuak ez zuen guztien onespena izan. Hain zuzen ere, 10 alegazio aurkeztu zizkioten. Tartean, Uribarriko auzo alkateak, Besaide mendi elkarteak, EB-Zutik koalizioak eta are gehiago, Gipuzkoako Foru Aldundiak berak ere gomendatu zuen Ikutixo ez zela leku egokia zabortegi bat eraikitzeko, gune hark duen balio ekologikoarengatik.

Bada, Hirigintza Sailetik emandako informazioaren arabera, alegazio horiek guztiak aztertu eta gero hartu du udal gobernuak behin betiko erabakia. Beraz, hoixe, Ikutixo dagoenetan utziko dutela, gune natural moduan, bere errekasto ugariekin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.