Hamabost kide dituen Goikobalu Txiki abesbatzak emango dio hasiera ekitaldiari Amaia Aboitiz zuzendari dutela eta lau kantu eskainiko dituzte, tartean Ken Zazpi taldearen Ilargia eta Mozarten Txirula Magikoa.
Ondoren, Rakel Murgiondok zuzendutako Goikobalu Gazte taldeak bederatzi kantu abestuko ditu, gehienak oso ezagunak: Lenon eta Mc Cartney-ren Ez etsi, Cold Play taldearen Viva la vida… 35 bat kidek osatzen du gazteen abesbatza, tartean ETBko Oh Happy Day saioko irabazle Jon de Andres eta Kantu Txapelketan bigarren geratutako Bea Asurmendi. Murgiondok jakinarazi digu ikasturte polita izan dela: "Iaz 15 urte bete zuen txikien abesbatzak eta musikala gertatu genuen; Errenteriako Kantu Txapelketan zilarrezko domina lortu genuen; hainbat topaketetan hartu dugu parte…"
Ekitaldia ikasturteko argazkiekin eta bideoekin osatuko dute eta koreografiak ere landuta dituzte. Gainera, bi abesbatzek elkarrekin abestuko dituzte bukaerako kantuak: Bi begirada zeru bat (J. Astiazaran) eta Nesiponono (J. Van der Sandt).