Igogailu publikorako sarbideak hobetzekotan

Zabaldu berri duten AP1 autobidearen ondorioz, inguruko herrien arteko autobus zerbitzuetan izango diren aldaketen berri emango dute udal agintariek gaur arratsaldean (astelehena) egingo duten asteroko batzarrean. Udan hasiko dira martxan zerbitzu berri horiek.

Bestalde, lan kontuak ere badituzte aurreikusita gaurko gai zerrendan; hain justu, udaltzain eta igeltseroen lan poltsa osatu gura dute udaletxean eta hori egiteko deialdiaren gaineko xehetasunak landuko dituzte.

Igogailu publikoan hobekuntzak

Eta gaur arratsaldeko batzarreko bestelako gairen bat aipatzearren, Arrasateko lehen igogailu publikoarekin lotutako puntua mahai gainean izango dute udal agintariek, hau da, Bizkaia etorbideko edo Muxibarko igogailuarekin lotutako puntua. Izan ere, igogailu horretarako sarbideak hobetu gura dituzte eta hori egiteko proiektua aztertuko dute gaur arratsaldean.

Osoko bilkura berezia

Hori gaurko batzarrari dagokionez; baina alkatetzatik dagoeneko iragarri dute oraingo astean beste bilkura bat egingo dutela, oraingo honetan osoko bilkura. Berezia izango da, ez ohikoa delako batetik eta puntu bakarra izango duelako, bestetik. Hitzordua eguenean da, maiatzaren 28an eta Arrasateko eskoletako neska-mutikoak joango dira oraingo honetan osoko bilkuren aretora, Agenda 21 ekimenaren barruan, aurten egindakoaren gainekoak azalduko dizkiete-eta, udal ordezkari politikoei.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.