Jokin Zaitegi plazako aterpean elkartu ziren lehenengo, Danok-Bat elkartearen aurrean, eta 75. urteurrena ospatzen dabilen elkarteari omenaldi apala eskaini zioten bandaren laguntzarekin. Handik plazarantz jo zuten zuzenean.
Zazpi konpainia, 240 ume
Tatiago doinuak jota sartu ziren danborrariak plazan eta euriak atertzera jo zuenez, plazaren erdian jarri ziren –bestela aterpean joatekoak ziren–. Gero, danbor eta kupel hotsen artean plazari buelta eman zioten ikurrina, Arrasateko bandera eta Sudc-eko bandera zituzten neskek jeneralarekin batera eta udaletxeko balkoira igo ziren guztiak.
Handik aurrera musika eta dantza jaiari hasiera eman zioten bandaren doinuek eta umeen danbor hotsek lagunduta.
Gutxienez 30 urte bete dituen Arrasateko Umeen Danborrada zazpi konpainiak osatu zuten eta guztira 240 neska-mutiko inguru atera ziren zapatuan.