Hotzari aurre eginaz, jende uholdea Santamasetan

Ganadu feria Laubide plazan jarri dute, artisauak Jokin Zaitegi plazan eta fruitu eta barazkiak, ohikoa den moduan, Seber Altube plazan. Haur, gazte zein heldu, guztien interesa piztu dute postuok.

Honetaz gain, eta txoko guztiak animatuz, ez dira falta izan herri kirolak, zanpantzarrak eta larrain dantza, besteak beste. Krixis txerriak begirada ugari erakarri ditu, baina zalantzarik gabe, taloa, txorizoa eta sagardoa bihurtu dira beste behin, produktu izarrak.

Fruita eta barazkien lehiaketako irabazleak ere eman dituzte jakitera. Hala, barazki posturik onenaren saria Aramaiora joan da, Jose Lonbiderentzat hain zuzen ere. Fruta posturik onena, Mutrikuko Antonio Iparragirrerena izan da, eta herriko posturik onenaren saria Mari Asun Iturbek eskuratu du. Guztiek ere Ino Galparsoro alkatearen eskutik jaso dituzte bai diru saria eta baita garaikurra ere.