Etxean egindako punk-oi!-a, formarik puruenean. Holidays in Bardulia Gipuzkoako punk-oi! mugimenduaren jaialdi handiena Arrasateko gaztetxean izango da. Egun bat eta gau bi, 13 talde eta hamar ordu iraungo dituen distortsio eta sentimenduz bustitako zuzeneko musika.
Izen berezia du jaialdiak. Nondik datorren? Sex Pistols taldearen Holidays in the Sun abestiaren izena hartu zuen musika jaialdi ospetsuan oinarritzen da; hori bai, jatorria bereiztuz. Barduliako doinuek –Bardulia sound– Bardulia dute jatorri, erdi aroan egun Gipuzkoa ingurua hartzen zuen lurraldea, hain zuzen.
Andoainetik Arrasatera
Aurten seigarren edizioa beteko du jaialdiak. Antolatzaileek adierazi dutenez, orain sei urte punk-oi!-a jorratzen zuten musika taldeen arteko harreman onak bultzatuta, "zerbait potoloa egitea" erabaki zuten, "aste bukaera baten, behintzat, denok elkartzeko". 2004ean Andoaingo gaztetxean abiatu zen abentura eta ordutik Oñatin (2005), Azpeitian (2006), Añorgan (2007) eta Beasainen (2008) egin du geldialdia. Halako jaialdi bat antolatzeak badu lana, baina gogo onez egindako lanak emaitza onak eman ohi ditu: urtez urte hazten joan da Holidays in Bardulia, Gipuzkoako –eta Debagoieneko– punk-oi! mugimenduarekin batera. Jaialdia mugimendu horren isla baita, finean.
Taldeen aukeraketa
Gipuzkoan bakarrik dozenaka talde daude. Hortaz, Holidays in Bardulia antolatzen dutenentzat ez da lan erraza jaialdian parte hartuko duten taldeak aukeratzea. Hala, irizpideak ez dira finkoak, baina normalean talde esperientziadunak eta gazteak eta diskoa atera berri dutenak edo kontzertu dezente ematen ari diren taldeak aukeratzen dira.
Zapaturako sarrerak, agortutaGaztetxean 600 pertsona inguru sar daitezke gehienez. Bihar lepo beteko da, zapaturako sarrerak eguaztenean agortu ziren-eta. Gaurko kontzertuetarako, ordea, ez da sarrera arazorik izango.
Vomitoren itzulera
Aurten luxuzko gonbidatua izango du jaialdiak. 1980ko hamarkadako talde mitiko batek joko du, Vomito –hasieran Vomito Social– taldeak, hain zuzen. Bihar igoko dira taulara, eta atzerapen aipagarririk ez balego, afalordu inguruan joko dute. Hala, belaunaldi berrientzat ereserki bihurtu diren Al borde de la carretera, Soy una bomba (bertsio berria) edota Mirando al abismo moduko kantuek ikuslegoa erotuko dute. Egubakoitzean aurkeztu zuten euren itzulera, Donostian.
Egubakoitza, 13 (21:30etatik aurrera) |
Plan B (Donostia) |
Sospechosos (Oñati) |
The Convicts (Arrasate) |
Aggressive Combat (Arrasate) |
Zapatua, 14 (17:30etatik aurrera) |
N.P.J. (Donostia) |
The Last Strength (Goierri eskualdea) |
Deficiencia Mental (Azkoitia) |
Friday's Crew (Azpeitia) |
Neallta Fola (Aretxabaleta) |
Vomito (Irun) |
Material Rechazado (Arrasate) |
Enboskada (Arrasate) |
Doubling Boys (Bergara) |
|
Taldeek goiko ordena berean joko dute; emanaldiak 45 minutukoak izango dira. |