1260. urtean jaso zuen Arrasatek hiri-gutuna Gaztelako erregearen eskutik. "Arrasate, baina, ez zen
hiri-gutunaz sortu Lezetxikin eta Murugainen aurkitu diren aztarnek
frogatzen duten moduan", adierazi du kultura zinegotzi Oihana Aranburuk. "Hiri-gutunaren urteurrena baliatuz, herriaren
historian sakondu gura dugu eta hitzaldi zikloa antolatu dugu".
Nabarralde elkarteak bi hitzaldi egingo ditu, lehena datorren
eguaztenean. Ondotik etorriko dira Jose Antonio Azpiazurena, Ana
Ugalderena eta Mertxe Urteagarena eta Toti Martinez de Lezea idazle
ezagunarena. Arrasateko gaztelua eta Arrasateko erreketa aztertuko
dituzte, besteak beste.
"Hor adibidez Goikobaluko gaztelua nafarra zela diote batzuk, beste batzuk berriz Gaztelakoa zela. Ikuspegi ezberdinak jaso nahi ditugu, eta horren inguruan hausnartzea da asmoa", esan du Aranburuk.
Ekitaldi gehiago aurreikusita
Bost
hitzaldi sorta ekitaldien hasiera besterik ez da izango. Udalak
herriko bi taldek egindako proposamenak jaso ditu. Bata, Doke
antzerki taldearena. Jose Mari Velez de Mendizabalen testu baten
oinarritutako antzerkia taularatzeko proposamena egin du.
