Herritarren ekarpenak jaso ostean, 750. urteurreneko ekitaldiak prestatzen dabil Udala

Arrasateko 750. urteurrena dela-eta, egitaraua prestatzen dabil Arrasateko Udala. Hala jakinarazi zuen Oihana Aranburuk, Udaleko Kultura Saileko arduradunak atzoko (eguena) udalbatzarrean. Hainbat taldek, hainbat proposamen aurkeztu dituztela jakinarazi zuen, orain guztiak aztertzen dabiltzala, eta gero egitaraua prestatzeko aurrekontua landu beharko dutela.

Kultura zinegotziak gaineratu zuen urteurrenari dagozkion ekitaldiak ez dituztela bakarrik Arrasateri hiri-gutuna (Carta Puebla) eman zioten egunera mugatuko, maiatzaren 15era, alegia; euren asmoa da egitarau zabalagoa prestatu. Dena den, Aranburuk adierazi zuen Arrasateko urteurrena ospatu edo ez, talde bakoitzak erabaki beharko duela, euren asmoa dela Arrasateko historian sakondu eta horren arabera, gero erabaki.

Aurrekontua landu behar

Aranburuk jakinarazi zuen baita ere, halako kasuetan bestelako herri batzuetan egin dituzten ekitaldiak aztertzen era badabiltzala, Tolosa, Mutriku eta Getariakoak, adibidez. Dena den, azpimarratu zuen aurrekontua definitzea izango dela zailena, Udalak jaso dituen proposamen batzuen aurrekontua, adibidez, oso altua delako. Datorren kultura batzordean landuko dute kontua. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.