Tradizio bihurtu da Arrasaten Arrasate Errugbi taldeak Aukea eta Kajoi tabernaren laguntzaz antolatzen duen Garagardoaren Festa. Eguenean inauguratuko dute aurten 11 urte bete dituen jaia. Irekiera ekitaldian Udaleko ordezkariek eta urteotan jaia antolatzen ibili diren enpresa eta lagunek hartuko dute parte.
Alemaniar erara
Zapatu gauera arte hamaika garagardo mota eta alemaniar errekiak –oilaskoak, saltxitxak, txerri-ukondoak...–dastatzeko aukera izango da. Izan ere, Joseba Maidagan ekitaldiaren antolatzaileetako batek adierazi duen moduan, "edateko ondo jan behar da aurretik". Bestalde, giroa are gehiago alaitzeko zuzeneko musika ere izango da karparen barruan.
Antolakuntzak jaiarekin bat egiteko gonbidapena egin die arrasatear guztiei.