Jende askoren ikusmina piztu zuen zapatuan Harremanek eta beste hainbat elkartek burutu zuten Elkartasun Egunaren hamaikagarren edizioak.
Aukera proiektuaren barruan, arazoak dituztenek garbitu, sailkatu eta konpondutako bigarren eskuko arropak; udan haur sahararrentzat udalekuak antolatu ahal izateko jarritako talo eta te postua; Indiako barnetegietarako dirua lortzeko Mumbain egindako bitxi eta zapien salmenta... Hainbat elkartek euren proiektuak aurkeztu zituzten Seber Altube plazan, eta orokorrean, gustura zeuden jendearen erantzunarekin.
Tonbola eta animazioa
Ibai-Artekoek emandako produktuekin egindako tonbolak ere partaide asko izan zituen. Antolatzaileak pozik zeuden egunak emandakoarekin; euren esanetan, krisiaren eraginaren beldur ziren, baina ez zuten nabaritu. Saldutako txartelen artean Asturiasen bi eguneko egonaldia zozketatu zuten: 3313 zenbakiari egokitu zitzaion (ordezkoa, 3336a).
Umeendako jolasak, Zaramasamba taldearen animazioa, Txan magoa... Elkartasun Egunak ez zuen aspertzeko betarik eman.