Debagoieneko harakinek Debagoieneko I. Okela Gisatu Lehiaketa jarri dute martxan. Mankomunitatearen, Giokela eta Eusko Label markako harategi batzuen eta Bolintxo okindegiaren laguntzarekin antolatu du txapelketa Ederto harakinen erosketa taldeak. Arrasaten izango da lehenengo txapelketa bihar, herriko plazan.
Gaur arratsaldera arte eman ahal da izena Kajoi tabernan.
Bihar 15:00etan jasoko dute okela Arrasateko lehiaketan parte hartuko
duten taldeek. Okela eta sua herriko harakinek jarriko dute, baina
gainontzeko osagaiak eta tresnak parte-hartzaileek eraman beharko
dituzte.
Lehiaketan prestatuko duten okela pintxotan salduko dute, 1,5 euroren truke, 19:00etatik aurrera. Diru hori herriko kultura elkarteen artean banatuko dute; Arrasaten, Lore Gazteak dantza taldearendako, adibidez.
Harategiak
Otamendi harategiak, Joxe Elortzak, Gorka harategiak, Agirretxek, Landaluzek, Joxean Izagirrek eta Azpilikueta harakinek jarriko dute okela biharko txapelketan.
3 kilo okela
Talde bakoitzak hiru kilo okela jasoko ditu. Jon Leturia Bergarako harakinak azaldu digu okela guztia behiaren zati berekoa izango dela. Gainerako osagaiak norberak jarri beharko ditu.
