Helduen heziketak Arrasaten dituen datuak begiratzea besterik ez dago euren beharra benetakoa dela ikusteko: 360 ikasle eta 15 irakasle dira. "Gaur egun ditugu hiru ikasgela; eta liburutegia ezin dugu erabili liburutegi moduan, ikasgela moduan erabiltzen dugulako. Bestalde, aprobetxatuz ikasgelak ere baditugula Eskoriatzan eta Aretxabaletan, haiek ere erabiltzen ditugu. Hala, jende askok Arrasatetik mugitu behar du Aretxabaletara edo Eskoriatzara".
Erdigunean
Ikastetxearendako lokal berriari dagokionez, berriz, kokagune egokia iruditu zaie Arrasate pasealekua: "Egoitza erdialdean gura genuen; San Andrestik, Zigorrolatik… guztiongandik antzerako distantziara egoteko".
Zer behar duten ere jakinarazi diote Udalari: irakasle-gela egokia, zuzendaritzarendako lekua, liburutegi ederra, informatika gela hobea… eta, jakina, ikasgelak.
Arrasateko Udalak, beraz, proiektua idazteko lanak adjudikatuko ditu lehenengo, gero egokitzapen obrak egin ahal izateko. "Aurten hasteko asmoa" dutela jakinarazi dute Hezkuntza Sailetik. "Baina hastapenetan dago oraindik", zehaztu dute.
Obra horiek egin ahal izateko zifra ere aurreikusi dute: 686.000 euroko inbertsioa. "Baina ez dakigu oraindik horrenbeste izango den; gero ikusi behar", diote Hezkuntzatik.
Beharren araberako eskaintza
Bien bitartean, Iturriotzen segituko dute helduak hezten; izan ere, eskaera handia dute Arrasaten, eskaintza baino handiagoa, EPAren kasuan: "Bigarren matrikulazioa ezin izan dugu guztiz zabaldu, lekurik ez dagoelako, eta batzuei esan behar izan diegu irailera arte itxaroteko", dio zuzendariak.
Izan ere, urteekin eskaintza asko handitu da EPAn, "bizimoduaren beharretara egokitu" dutelako. Adibidez, atzerritarrendako eskaintza ere badute: "Hasi ginen gaztelera ematen, eta denborarekin ikusi dugu behin hori ikasita askok gura dutela euskara ere ikasi. Hori ematen hasi eta egundoko arrakasta du…", diote.
Batzuk ikasteko gogoz, besteak erakusteko gertu, kontuak kontu, EPAk badirudi etorkizun sendoa duela Arrasaten.