Eta ez pentsa ez, musika klasikoan oinarritutako piezak interpretatuko dituztela egubakoitzeko kontzertu horretan. Alderantziz, prestatu dituzten kantu gehienak moderno-modernoak dira, gehienondako aski ezagun eta entzunak.
Esaterako, La Abeja Maya interpretatuko dute soraluzetarrek; edo 5ª Estación musika taldearen El Sol no Regresa kantua, rantxera ukitua duena, joko dute Oñatiko Jose de Aspiazu musika taldeko ikasleek.
The Pogues ere bai
Zeltiar ukitua ere aurkitu ahal izango dugu, baina, egubakoitzeko kontzertu horretan, Aretxabaletako Leizarrako musika eskolako folk taldeak Scothland the Brave kantua prestatu duelako, eta baita ere, Arrasate Musikalekoen eskutik, The Pogues talde irlandarraren Fiesta kantua entzun ahal izango delako.
Ekitaldia borobiltzeko, Bea Asurmendi aramaioarrak eta bere taldeak kontzertu berezia eskainiko dute.