Etzi, maiatzaren 20an berriz, kalejira zaratatsua aterako da Musakolako kiroldegitik 18:30ean; jakinarazitako ibilbidearen arabera, Musakolatik San Andres auzorainoko bidea egingo dute, herrian barrena, protesta ozenean.
Eta grebaren egunari dagokionez, berriz, hainbat dira eguenerako egin dituzten hitzorduak. Goizean goizetik hasiko dira, gainera, 05:30ean, enpresen sarreratan pikete informatiboak izango direla iragarri dute-eta. 11:00etan, berriz, Donostiako manifestaziora joateko autoak aterako dira Arrasatetik eta bukatzeko, 18:30ean manifestazioa egingo dute Arrasaten.
Egueneko grebarekin bat egiten duten Arrasateko eragile sozial, politiko eta sindikalek oro har, aldarrikatu gura dute “indarrean dagoen eredu kapitalista aldatu beharra” daukagula, eta salatu dute “gutxi batzuk herrialde osoen adinako ondasunak” dituztela. Orain bizi dugun krisiaren gainean, berriz, azpimarratu gura izan dute "espekulatzaileek" sortutakoa dela eta "uko" egiten diotela "euren diru-goseaz sortu duten krisia ordaintzeari".