Mahaiaren inguruan gustura aurkitu ditugu auzotarrak. Bertaratutakoek gazta, txorizoa, urdaiazpikoa eta edatekoak aurkitu dituzte prest elkartean. Madinabeitia soinujole aretxabaletarra ere atsedenik hartu gabe aritu da gosaria alaitzen, aurreko urteetan bezala.
Pilota txapelketa
San Esteban jaiak egubakoitzean hasi zituzten Udalan. Auzotarrentzat antolatutako pilota txapelketa jokatu zuten; domekan, ostera, afaria egin zuten auzotarrek. Giro ona izan zutela afarian azpimarratu du Martin Uribarren auzo-alkateak. Guztira 30 lagun inguru elkartu ziren, eta gaua giro alaian pasa zuten.
Puzgarriak eta kart zirkuitua
Auzotar nagusiak aurkitu ditugu Udalaitz-azpi elkartean gosaltzen. Baina, Udalako jaietan arreta handia eskaini diete aurten umeei. Hori horrela, puzgarriak eta kart zirkuitua izan dituzte euren gozamenerako. Aurrekontuaren arabera, auzoko txikienek ahalik eta ondoen pasatzeko egitaraua prestatzen dute Udalan. Lehenengo orduan gazte gutxi ikusi ditugun arren, eguna aurrera joan ahala asko izan dira puzgarrietara hurbil diren gaztetxoak. Madinabeitia soinu jolearen laguntzarekin egindako poteo herrikoia izan dute ondoren Udalan.