Abenduaren 1ean da HIESaren kontrako nazioarteko eguna; eta horren harira, Arrasateko Sexologia Zerbitzuak GIB (Giza immunoeskasiaren birusa) antigorputzen presentzia detektatzeko frogak egingo ditu abenduaren 2an. 15 minutu inguruko froga da.
"GIB birusak infektatuta gauden edo ez jakiteko, arrisku praktikak eduki eta sekula analisirik ez badugu egin, GIB-a eduki arren badaukatela ez dakiten pertsonek birusa beste pertsona batzuei ez transmititzeko…". Horiexek dira Sexologia Zerbitzuak eman dituen arrazoietako batzuk datorren abenduaren 2rako antolatu duten Frogaren Egunean parte hartzeko; edo bestela esanda, GIB froga egiteko.
Eguazten arratsaldean
Hitzordua egin dute 17:00etatik 19:00ak bitartean, Garibai etxearen bigarren solairuan. Eta iragarri dute Arabako HIESAren kontrako batzordekideak etorriko direla froga horiek egitera gura duen edozeini.
Informazio gehiago behar izanez gero: 943 25 20 66.
