Zabalgunean (Gelman), esaterako, dagoeneko ipini dute geraleku berri bat, markesina eta guzti. Urbanoa oraindik ez da handik pasatzen, baina aurreikusita dago Zabalgunea urbanoaren ibilbide berriaren barruan sartzea.
Legarre
Bestalde, Legarreko geralekua ere lekuz aldatuko dute eta, seguru aski, orain dagoenaren parean ipiniko dute berria; baina oraindik zehazteko dute behin betiko kokalekua.
Garaia
Eta, besteak beste, Udalak aurreikusita dauka, baita ere, Garaia inguruari zerbitzua emateko handik pasaraztea autobus urbanoa; kasu horretan zehazteko dutena da zein ibilbide egingo duen urbanoak inguru hartaraino iristeko.
Hain zuzen ere, Arrasateko autobus urbanoaren gaineko txostena egiten dihardute eta hortxe finkatuko dituzte urbanoaren zerbitzu eta ibilbide berriak.
Informazio-zutabe berriak
Horrez gainera, aurten ere berritu egingo dituzte hainbat geralekutan dauden informazio zutabeak; urbanoaren ordutegia-eta dakarten zutabeak, alegia. Halako hamar berri erosi ditu Udalak. Adibidez, Garibai etorbideko geralekuan ipiniko dute zutabe berri horietako bat.