Badoa itxura hartzen Gelmako etxebizitzak inguratzen dituen urbanizazioa. Obenerrekatik, etxeok eraikitzen dabilen enpresa sustatzailetik jakinarazitakoaren arabera, "ezustekorik ezean" asteon bertan kenduko dituzte Gelmako obrak ixteko ipinita dauden hesiak, eta inguru guztia zabalik utziko dute.
Izan ere, zoladura botatzea besterik ez zaie falta urbanizazio lan guztiak bukatzeko. Eta hori asteon egingo dutela aurreikusi dute. Are gehiago, dagoeneko hasita dira zoladura botatzen.
Horrez gainera, etxebizitzen ingurua urbanizatzeaz gainera, besteak beste, zubia berritu egin dute, errekaren alde bata eta bestea lotzen dituen zubia, mataderoko biribilguneraino doana. Zubia zabaldu egin dute dezente, eta dagoeneko zirkulaziora zabalik dagoen arren, hari ere zoladura eta erremateak falta zaizkio.