'Berez, guztiak salgai'
Edozelan ere, Juan Lartzabalek, Obenerrekako gerenteak argi utzi gura du
etxebizitza guztiak salgai daudela oraingoz: "Berez, guztiak daude
salgai. Orain gaude saltzen lehen blokeko etxebizitzak; guztira, 143
etxebizitza gabiltza eraikitzen bloke horretan, etxebizitza libreak; eta
horien erdia salduta ditugu dagoeneko. Gainerako %50ak zela saltzen
diren ikusi behar dugu orain. Bloke horretako etxebizitzak saldu artean,
gainekoak ez ditugu salgai ipiniko. Hori horrela, bigarren blokea
eraikitzen bukatzen dugunean oraindik ez baditugu lehen blokeko
etxebizitzak saldu (%90, gutxienez), orduan alokairuan merkaturatuko
ditugu. Guztia dago merkatuaren menpe. Hori bai, etxebizitzen prezioetan
ez da aldaketarik aurreikusten.
Salmenta 'geldo'
Horren harira, Juan Lartzabalek onartu egin du etxeon
salmenta erritmoa geldoa dela. Batetik, berez, "merkatuaren koiuntura
orokorra" horixe delako, "interes altua dago, besteak beste". Eta
bestetik, Lartzabalek nabarmendu du bere ustez, Gelmaren etxebizitzen
inguruko zurrumurruek ez dutela batere lagundu etxeok saltzen.
Prezioa 'ez da larregikoa'
Hori bai, Lartzabalek ez du uste salmenta geldo dabilela, askok dioten moduan, etxeon prezioa larregikoa delako: "Etxeon prezioa da kalitatearen araberakoa. Nik uste dut jendeak ikusten dituenean etxeak, erosteko aukera ona direla pentsatuko duela. Oso dotoreak izango dira. Eta gainera, Gelmako etxebizitzen prezioak ez du behera egingo. Bestalde, etxeon metro karratua 6.000 eurotan saltzen gabiltzala esatea ere ez da erreala. Datu hori eman zutenek, prezio horren barruan sartu zituzten garaje, trasteleku, notariako gastuak eta beste. Baina, etxebizitza horien batazbesteko prezio errela da 4.156 euro metro karratuko. Eta esan beharra dago Arrasaten, adibidez, badirela prezio hori baino gehiago kobratzen diren etxebizitzak".