Momentuz, Euskadiko Kutxako bazkideei zabaldu diete operazio esklusibo horren eskaintza, eta zenbaitzuk badabiltza bai, pisuok ikusten. Izan ere, etxebizitzen prezioa merkatukoa baino baxuagoa izateaz gainera, Euskadiko Kutxak berak “finantzaketarako baldintza bereziak” emango dizkie.
Kopuruak begiratuta, metro koadro eraikia 3.300 eurotan erosi ahal dute kooperatibistek. 230.000 euro balio du merkeenak; 41 metro koadro ditu eta bakarra da. Garestienak, berriz, atikoak dira. Horiek balio dute 515.000 euro. Gainerakoak erdibidean daude: 260.000-330.000 eurokoak dira gehienak. Etxebizitza denak domotikoak dira eta garajea itxiak ere badituzte. Hori bai, garajearen prezioa ez dago etxebizitzaren prezio barruan, eta etxebizitza erosiz gero, garajera ere derrigor erosi beharra dago.
Ez ohiko eskaintza
“Aukera bakarra da. Oso etxe onak dira, Gipuzkoan diren kalitaterik handienekoak, eta ondo kokatutakoak. Eta gainera, bi digituko beherapenarekin”, azpimarratu du Juan Larzabalek, Obenerrekako ordezkariak. “Ez ohiko eskaintza da. Ekainean bukatzen da. Bi arrazoirengatik: batetik, ekainaren amaieran BEZa igo egingo dutelako. Eta bestetik, Estatu mailan aurten bukatzen direlako desgrabazio fiskalak, etxebizitza erosteagatik ematen dituztenak”.
LKSkoek eurek egin zieten eskaintza esklusibo hori Obenerrekakoei, baina ez da orain asmatu duten zerbait. “Lehenago ere egin dute halako bat, Sukiaren promozio batekin, Uribarrin”.
Gainerako blokeen egoera
Hasiera batean, bloke hori alokairuan merkaturatzeko asmoa zuen Obenerreka enpresak. Orain, berriz, saldu egingo du. Eraikitzen edo eraikita dauden gainerako blokeei dagokienez, berriz, lehen blokean etxebizitzen erdiak baino gutxiago geratzen zaizkie saltzeko. “Hirugarren blokea (114 etxebizitza) oraingoz ez da egingo. Momentuz egingo da fatxada, eta kito. Salmentak berriro hazten badira, orduan bukatuko da, baina hori izango da urte batzuk barru. Salgai daude, beraz, LKSren etxeak eta lehen blokeko erdiak baino gutxiago. Urbanizazioa, berriz, osorik bukatuko dugu: plaza, oinezkoendako pasealekua… Eta adibidez, merkataritza saltokiak zabalduko dituzte laster inguruan. Telepizzak eta Ogiberrikoek erosi dute dagoeneko lokala”, jakinarazi du.