Etxeko taldeari kosta egiten zaio hasieratik partiduan sartzea; hala, lehenengo zatian nahiko motel aritu ziren arrasatearrak. Ez ziren zelai erdiaren jabetzarekin egin eta baloi dezente galdu zituzten. Baina, aurrean zuten jokalariek ere ezer gutxi egin zuten. Hori dela eta, lehenengo zatiko 37. minutuan, markagailuan aurretik jartzea lortu zuten etxekoek. Atzealdean Lazpiurrek hasitako jokaldi baten ondoren, Lopezek baloia sareetan sartu zuen. Atsedenera markagailuan aurretik joateak mesede egin zien arrasatearrei. Hala, bigarren zatian gehiago izan zen etxeko taldea. Aparteko jokorik egin gabe, Mondrak bigarrena egiteko aukerak izan zituen: Garinek area barruko jaurtiketa batean eta Gotzonek buruz errematatutako beste batean, adibidez.
Denboraz kanpo
Azkenean, baina, Ordiziak egin zuen gola, arauzko 90 minutuak pasatu zirenean. Beste behin, Mondrak azkeneko momentuan galdu zituen bi puntuak.
Zapatuko berdinketa eta gero, Mondra sailkapeneko 10. postuan dago. Datorren astean Berioren aurka jokatuko dute.