Arrazoia da Garagartzako zerbitzuak "konpetentzia desleiala" egiten dietela autoen tailerrei. Juan Martin Lopezek, AEGAko idazkari orokorrak aditzera eman du Garagartzako zerbitzuak dituen hamar urteotan isilik izan direla.
Orain, baina, ikusita zerbitzua hobetu egin behar dutela, erabaki dute Arrasateko Udala salatzea, ezin dutelako onartu erakunde publiko batek "konpetentzia desleiala bideratzea fondo publikoak" erabilita, "gutxienez alegalitate egoeran daude", eta uste dute orain zerbitzua hobetzen badute, konpetentzia handitu egingo dela.
Automobilgintzako Enpresarien Elkarteko kideak dio auto tailerrek "igartzen" dutela bezeroak Garagartzara joaten direla, eta horrek tailerretan "langabezia handitu" egingo duela salatu du, bereziki orain, krisi garaian gauden honetan. Eta gaineratu du ez dutela “adar jotze” gehiago onartuko.
Udalaren erantzuna
Udalari dagokionez, Udal agintariek diote ez dutela salaketarik jaso, komunikabideen bitartez izan dutela horren guztiaren berri eta ez daudela "ados" esaten dituzten gauza askorekin.
Edozelan ere, argi utzi gura izan dute Garagartzako eremua ez zutela abiarazi "tailer mekanikoak ordezkatzeko" helburuarekin, "baizik eta erreka eta beste hainbat bazterretan modu desegokian egiten ziren auto garbiketa eta beste hainbat jarduera txiki modu kontrolatuan egiteko".