Partidu juxtua izan da Ford Mugarri eta Corazonistasen artekoa; oso berdindua, zati bietan. Arrasatekoak hasi dira irabazten, eta Gasteizkoak momentu bakar batean ere ez dira markagailuan aurretik ipini. Lehen zatian, pare bat goleko errenta izan du Ford Mugarrik, baina bukaera alderako laukoa izatera ailegatu da; markagailuak 14-10 emaitza erakusten zuen, atsedenera joan direnean. Bigarren zatiko lehen bost minutuetan, gasteiztarrek bi goletara murriztu dute aldea; gero, 4-5ekoa izatera pasa da, berriz; markagailua berdindu egin da, hurrena; eta arrasatearrek buelta eman diote, amaieran. Hala, 27-21 amaitu da neurketa, Iturripen, eta bi puntuak etxean geratu dira.
Defentsan, ohi baino ahulago
Garaipena eskuratu arren, Edu Orgaz entrenatzailea ez zegoen gustura taldeak egindako jokoarekin: "Ez dugu oso partidu ona egin, ez dugu erritmoa guk markatu eta kosta egin zaigu partiduan sartzea. Eurek, gainera, bakarkako joko asko egin dute eta hori ez da guri ondoen doakiguna". Hain justu, aurkarien bakarkako joko hori dela-eta, Arrasateko mutilak ez dira defentsan ohi bezain ondo ibili.
Edu Orgazen taldearentzat Euskadiko Txapelketako bigarren partidua izan da gaur, domeka, jokatu dutena. Lehendabizikoa joan den astean jokatzekoak ziren baina, Urdulizek hala eskatuta, eguenera atzeratu zuten. 31-25 emaitzarekin, Ford Mugarri izan zen nagusi eta, beraz, orain arte jokoan egon diren lau puntuak eskuratu ditu Arrasateko taldeak. Uneotan, hiru talde daude berdinduta, launa punturekin, sailkapeneko lehen postuetan.
Usurbil eta Basauri
Hurrengo aste bukaeran ere saio bikoitza egingo dute Orgazen mutilek. Basauriren kontra neurtuko ditu indarrak, batetik; eta Usurbilen aurka, bestetik. Basaurik txapelketa oso ondo hasi ez duen arren, bikain amaitu zuen denboraldia eta, hortaz, neurketa gogorra izango delakoan daude arrasatearrak. Usurbili dagokionez, bestalde, lasaiago daude; aurten igo den taldea da eta, beraz, bi puntuak eskuratzea espero dute.