Film laburren zirkuitua eta 'Bidaia Intimoak' dokumentala kulturaten

Korrika kulturala programaren barruan film laburren VI. zirkuitua Arrasatera iritsiko da datorren eguenean AED eta Topagunearen eskutik. Kulturaten eskainiko dute emanaldia 18:00etatik aurrera. Bertan zortzi film eskainiko dira eta guztira ordubeteko iraupena izango dute. Zortzi filmen artean debagoiendarrek egindako bi daude: Ivan del Campo arrasatearraren 'Lo bakarrik' eta Yera Sanchezen, 'P.D.: Ondo ibili'. Ivan del Camporen filmean insomnioak jotako emakume batek dena probatu du, eta hala ere ezin du lo egin. Ezagutzen du inork lokartzeko moduren bat, hutsik egiten ez duena? Laburmetraia honetako protagonista prest dago edozertarako. Yera Sanchezen filmean, berriz, Leire da protagonista, eta munduari bira eman nahi dio baina ezin du. Irudimena erabiliko du bisitatu nahi dituen hiriak Donostian bertan aurkitzen. Beste sei film laburrak ondorengoak dira: 'Berde', 'Musika', 'Poema baten irakurketa Euskal Herrian', 'Egiatik gezurrezko bizitzara', 'Kabia' eta 'Bankuaren lapurreta'.