Josune Garai, obren zuzendaritza lanak egiten dabilen udal teknikariak kontatu duenez, aparkalekuaren oraingo irteera ez da egokia, justu oinezkoen pasabidera ateratzen delako. Gainera, autoen joan-etorriaren eraginez, irteeran dagoen espaloiaren egoera nahiko txarra da.
Hori horrela, irteera berria egingo diote aparkalekuari. Oraingo irteeratik metro batzuk urrutirago, Amaia Antzokirantz.
Horrez gainera, ate korredero bat ipiniko dute, eskola orduetan itxita egongo dena, umeak babesteko. Eta eskola orduak bukatzen direnean, udaltzainak arduratuko dira hura zabaltzeaz.
Hori guztia egin ahal izateko, zuhaitz bat kendu egin dute dagoeneko, eta inguruko saneamendu eta bestelako azpiegiturak egokitu egin beharko dituzte.
Epea eta aurrekontua
Hiru hilabeteko epea zehaztu dute obrak bukatzeko. Baina, Udaleko teknikariak uste du lehenago bukatu ahal izango dituztela, abuztua tartean dagoela aprobetxatuz.Construlan Debagoieneko Eraikuntzak dabil obrak egiten. Aurrekontua, berriz, 55.000 eurokoa da.