Patxi Irurzunek gogoratu duenez, Charles Bukowski idazlearen omenez deitutako Hijos de Satanás ipuin lehiaketan lehen saria irabazi ondoren, Josu Arteagaren ibilbide literarioa gertutik jarraitu du. Hain zuzen ere, bera izan zen orain argitaratutako eleberria irakurri zuen lehenengoetakoa; eta Irurzunen ustez, berau irakurtzen nabaria da idazleak primeran pasa duela. Hain zuzen ere, horixe aitortu du Josu Arteagak berak gaurko aurkezpenean. Irakurle amorratua dela eta irakurketa berarentzat droga moduko bat dela gehitu du Arteagak. Miriam Mirandaren hitzetan, "Jorge Gimenez Alberdaniako editoreak hasieratik azaldu zuen konfiantza Arteagaren eleberriarengan eta benetan liburu gomendagarria da, primeran idatzita dagoelako eta ukitu berezia duelako".
Aurkezpenaren ondoren, hainbat ale sinatu ditu Arteagak. Luntxa ere izan da jarraian bertaratuendako.
Fantzine berria kalean
Ekitaldi berean, Arteagak Bilboko 'Ekintza zuzena' aldizkariaren azken alea aurkeztu du eta, era berean, 'Putusein' fantzinea aurkeztu dute gaztetxeko kideek. Gazteen presentzia aldarrikatu nahi du 'Putusein'-ek (puskar usaina Arrasateko euskaran, gaztetxeko kideek argitu dutenez), tonu zirikatzailean. Doan banatuko dute eta parte-hartzailea izatea nahi dute. Kolaboratu nahi duten guztiek putusein@gmail.com helbidera idatz dezakete.