Atzo onartutako mozioaren bitartez, salatu zuten atxilotutako pertsona horiek “euren jardun politikoagatik espetxeratuak” izan direla eta haiek “berehala aska ditzatela” exijitu zuten. Baita ere “Alderdien Legea berehala deroga dezatela”. EAJren, EAren, Aralarren, Alternatiba-Zutik koalizioaren eta udal gobernuko kideen ustez, lege hori “aukera politiko eta sozial bat desagerrarazteko ari dira baliatzen”.
Eta era berean, “espainiar estatuaren jardunbide antidemokratiko, autoritario eta errepresiboak” salatu zituzten mozioaren bitartez. Uste dute “jardunbide horrekin irtenbide bakarra gatazka luzatzea” dela.
PSE-EEk gogor egin zuen kontra
Mozio horren kontra gogor egin zuen Aritz Arrietak, alderdi sozialistako bozeramaileak. Aditzera eman zuen zenbaitzuk uste dutela guztiak daudela euren kontra. Eta ez dela horrela. Azpimarratu zuen Alderdien Legeak ez dituela “ideiak ilegalizatzen”. Eta gogora ekarri zuen Europako epaitegiek erabaki zutela Alderdien Legea legearen barruan dagoela.
Horrekin batera, hainbat datu ere eman zituen, adibidez, salatu zuen 42.000 lagunek jasaten dutela jazarpen biolentzia, alderdi sozialistako 339 zinegotzik eta Ppko 184k bizkartzainekin ibili beharra dutela eta gogora ekarri zuen, baita ere, milaka lagunek alde egin behar izan duela Euskaditik ETAren eraginez.
Gatazka konpontzeko traba
Gainerako alderdietako ordezkariek erantzun zioten banan-banan, eta labur esanda, azpimarratu zuten argi dagoela azkeneko atxiloketak Euskal Herriko gatazkaren konponbiderako ahalegina trabatzeko ekintzak izan direla. Halakoekin biolentziak etengabe segituko duela salatu eta lan politikoa egiteagatik herritarrak atxilotzea gaitzetsi zuten. Halakoen aurrean ez direla isilduko azpimarratu zuten.