Ino Galparsoro Arrasateko alkateak komunikabideen bidez jakin zuen berria. "Zapatu goizean, etxean nengoela, irrati bidez entzun nuen albistea. Jakinarazpen ofiziala 13:45ean ekarri zidaten bi poliziek udaletxera", dio Ino Galparsorok. Baltasar Garzon epaileak, berriz, egubakoitzean hartu zuen Arrasateko alkatea deklaratzera deitzeko erabakia, PSE-EEk eta EAJk elkarrekin aurkeztutako mozioa bozkatzeko Arrasaten egin zuten ez ohiko osoko bilkuraren hurrengo egunean. Udalbatzarrak ez zuen mozioa onartu.
Urrats bat gehiago
Ino Galparsororen iritziz, gertaera hau "zorakeria honetako urrats bat gehiago da". "Argi dago EAE-ANVren aurka egiteko edozerk balio duela", gaineratu du. Arrasateko alkateak abokatuari erakutsi dio poliziek eramandako jakinarazpen ofiziala eta gaur, astelehena, goizean, aztertuko dute gertaera elkarrekin.
Baltasar Garzon epaileak otsailaren 8an kaleratu zuen EAE-ANVren jardueren etetea agintzen duen autoa eta agindu hori bete ez izana egotzi diolako deitu du deklaratzera Ino Galparsoro.