Bi helburu ditu zerbitzu berri horrek: batetik, herritar bakoitzak beharrezkoa duen medikazioa behar bezala har dezan laguntzea. Bestetik, botiken arrazoizko erabilera bideratzea. Izan ere, botikak farmazian bertan prestatuz gero, pertsona bakoitzak beharrezkoa duena kontsumituko du bakarrik, eta ez orain moduan, botika kaxa osoak erosi beharra izaten dutela.
%40 aurreztu
Datu bat: gaur egun botikak banatzeko sistema hori erabiltzen duten herrietan gastuaren %40 aurrezten dute. Adibidez, Eskoriatzan sistema hori martxan dute, eta Arrasateko Udaleko Gizarte Saileko teknikari-buruak jakinarazi duenez, “oso ondo funtzionatzen du”.
Ez da derrigorrezkoa
Edozelan ere, zerbitzu horretan parte hartzea borondatezkoa izango da. Onartzen dutenei zerbitzuaren funtzionamenduaren gaineko oinarrizko azalpenak emango dizkiete farmazilariek etxez etxeko laguntzaileei eta, baita ere, etxean nagusiak zaintzen dituzten senitartekoei ere. Eta gero, farmazilaria eta familia medikua arduratuko dira jarraipena egiteaz.
240 onuradun
Arrasaten, gaur egun 240 pertsona daude etxez etxeko laguntza jasotzen. Horiexek izango lirateke momentuz onuradunak, baina helburua da denborarekin adineko guztiei zabaltzea zerbitzu hori eskuratzeko aukera.